اساسيات المكياج: تستعملين بيتوي بلندر غلط؟

اهلين بنات ان شاء  الله تكونون بخير 

اكيد كلنا عندنا او جربنا البيوتي بلندر و اشباهها من اسفنجات المكياج و ممكن نواجه اخطاء فاليوم حبيت اشاركم ببعض  النصايح عشان تحصلون على نتيجة كويسة

اول خطاء: تستعملينها ناشفة

ادري ان سمعتو هالنصيحة كثيير بس فعليا لسة انصدم ان في بنات يستعملونها ناشفة للحين, ضروري تببللونها عشان تدمج لكم  كويس بدون ما تمتص الفاونديشن او تخطط معاك مو لازم تخلينها تقطر من البلل بس تأكدي انها رطبة و لو حسيتيها نشفت رشي عليها فكس بلس او اي بخاخ مكياج عندك

متى استعملها ناشفة؟

ممكن تستعملينها خلال اليوم عشان تعدلين الكونسيلر اذا خطط معاك او لو كثرتي بلش او برونر امسحي على خدك فيها و هي ناشفة بتخففة بدون ما يخرب الفاونديشن تحتة كانها مساحة سحرية للمكياج

اذا يخطط معاك الكونسيلر او يبان تحت عينك ناشف بعد ما تثبتينه جربي تحطين البودرة باسفنجة مبلولة, الرطوبة بتقلل من المظهر الناشف و بيوزعها لك بشكل متساوي فما راح تكتتل و بيبان طبيعي 

الخطاء الثاني: تحطين الفاونديشن عليها

اذا سويتي هالحركة الاسفنجة بتمتص 60% من الفاونديشن و بتحتاجين كثير منه فبتضيعين كمية كبيرة من المنتج بدون فايدة و النقطة الاهم هي انها بتكون صعبة جدا بالتنظيف, حطي الفاونديشن على يدك او باليتات الخلط موجودة بانجلوت و اونلاين او ممكن تستعملين صحن صغير او قاعدة اكواب و خذي منها الفاونديشن او طريقتي المفضلة هي اني امد الفاونديشن بفرشة فلات و بعدين ادمج بالبيوتي بلندر كذا احافظ على تغطية الفاونديشن و يبين نظيف و قطعة وحدة

الخطاء الثالث: تستعملينها بطريقة المسح

الاسفنجة تعطيك منظر طبيعي بدون خطوط و هذا الهدف منها فدايما استعمليها بالطبطبة عشان تدمجين الفاونديشن كذا بتتحكمين بدرجة التغطية و التوزيع بيكون متساوي وتقدرين تبنين التغطية بسهولة و ما راح يتحرك الفاونديشن اواي شي تحتة مثل البرايمر او الكورتر و يبان مخطط

الخطاء الرابع: ما تتعاملين معاها كويس

احيانا نتعامل مع البيوتي بلندر على انها فرشة و ننسى انها مصنوعة من اسفنج فلازم نكون رقيقين معاها حاولي ما تضغطينها او تعصرينها بقوة عشان ما تتقطع معاك و خصوصا اذا اظافرك طويلة مثلي خربت اسفنجات كثير باظافري و قطعتهم

الخطاء الخامس: ما تنظفينها صح

البيوتي بلندر او اي اسفنجة تكون سريعة الامتصاص فغلط انك تهملينها  و بما انها رطبة فهي المكان المفضل للبكتريا ضرووري تغسلونها بعد كل استعمال ممكن تغسلينها بصابونتها او اي صابون صلب مضاد للبكتريا و ما فيه عطور زي ديتول او لايف بوي

اذا واجهتي صعوبة بتنظيفها جربي تحطينها بموية حارة و صابون بالمايكرويف 10 ثواني بس و بتتنظف معاك بشكل عميق او بس خلوها بصحن فيه موية حارة كم دقيقة و تنظف

الخطاء السادس: تتركينها بمكان مغلق و هي رطبة

هذي من اهم النقاط بنات اذا كانت مبلولة و تركتيها بمكان مغلق او ما نظفتيها و عقمتيها صح بينمو فيها عفن (نقط سودا او خضراء)!! فانتبهو خليها بمكان مكشوف فيه تهوية الين ما تنشف تماما عشان ما تنمو الكتيريا داخلها و تبداء تتعفن و اذا بداء يظهر عليها نقط تخلصو منها بسرعة عشان ما تسبب لك حبوب او تحسس ببشرتك,  كتبت عن هالشي من زماان قبل سنتين بأنستغرام اضغطو هنا عشان تقرون الموضوع 

     

الخطاء السابع: ما تغيرينها بشكل دوري

البيوتي بلندر ضروري تتبدل لا تعاملينها مثل الادوات الباقيه طبعا هالشي يعتمد على حسب استعمالك لها حاولي تغيرينها كل شهرين كقاعدة و لاحظي اذا بدا يبهت لونها و يتغير شكلها لما تنشف او تخطط الفاونديشن معاك و تحسينها متكتلة او ثقيلة غيريها على طوول

و بكذا نكون خلصنى موضوع اليوم ان شاء الله يكون عجبكم و طلعتو بمعلومة جديدة قولو لي ايش الاغلاط اللي كنتو تسوونها لاسفنجاتكم؟؟  

اشوفكم بالتدوينة الجاية

the other side of me جانب مختلف من حياتي

اهليين بنااات 

مبسوطة جدا بهالتدوينة لان معاي اكثر من بلوغر احبهم و اتفقنا ان بهذا التعاون نطلع من جو المكياج و نعرفكم عننا اكثر

فاليوم التدوينة بتكون عن اشياء احبها خارج عالم المكياج

طريقة القهوة السحرية

اول شي ببداء فيه هو حبيبة قلبي القهوة اللي متابعيني بسناب يعرفون مدى عشقي لها و في وصفة كل ما اسويها تنهار علي الاسئلة فقلت اشارككم الطريقة هنا اسهل و عشان ما يصير فيه عذر للغذرات ههههههههه

انا تعلمتها من بلوغر بحرينية اسمها نبيلة بسناب شات بكتب لكم حسابها للي حاب يضيفها 

snapchat: noono_94

بتحتاجون علبة نسكافية او اي قهوة تحبونها انا استعمل نسكافية غولد

ربع العلبة سكر هالكمية بس تلغي مرارة القهوة انا ما احبها حالية ابد ممكن تزيدين براحتك, و ربع العلبة موية باردة

اذا تبون تحطون منكهات ضيفو اللي تحبون(احط علبة بودرة فانيلا) ممكن تحطون كراميل او شوكلاتة براحتكم

حطو كل هالمكونات مع بعض و استعملو مضرب يدوي هذا اهم نقطة

اخلطوها تقريبا 10 دقايق الين تصير زي الكريمة ثقيلة و بيفتح لونها بعدين عبوها بعلب و خلوها بالفريزر ما تتجمد ابد بيظل قوامها كريمي و كل ما بغيتو قهوة خذو منها ملعقتين او 3 و حطو معاها الحليب سواء لقهوة باردة او حارة طمها مرة حلو  و لاننا خفقناها تسوي رغوة على السطح فتصير كانها من الة قهوة ما استغني عنها للجامعة لانها سريعة و اذا ما عندكم مكينة قهوة بتحبونها

الافلام و المسلسلات

مرررة احب الافلام و المسلسلات و اقدس وقتها لازم اسوي لي جو و ما احب احد يزعجني و انا من الناس المزعجة اللي لما امدح لاحد فلم او مسلسل اصير ابي اشوفه معاه عشان اتاكد انه مركز و لاااازم يعجبهم

انا اتفرج اونلاين ما احب احمل الحلقات و هذا هو الموقع اللي استعمله فيه ل شي و تنزل الحلقات بسرعة بس حددي المسلسل اللي تبينه و تحت كل حلقة بقسم التعليقات بتلقون الناس تاركين روابط مجانية كثييير اختارو اي واحد و تفرجو
 tvmuse.com

احب اصبغ

ما اقصد شعري احب ادهن طاولات ,كراسي, ابواب اي شي مرة استمتع و مرة اخذت دورة عن هالشي

ابحث عن اللي اشوفة او اقراة

دايما عندي ضول اذا سمعت قصة احد او شي قديم و تاريخي يصير عندي فضول اعرف السالفة كلها و عادي اقعد ساعات اشوف افلام وثائقية بسبب كلمة قريتها او خبر لازم ما يفوتني شي ههههههه و على طاري الافلام الوثائقية بقول لكم على عادة غريبة عندي لما تصير فترة الامتحانات النهائية بالجامعة تمسك معاي افلام وثائقية عن امراض نادرة و جرائم قتل عشان اهيئ نفسي و اتقبل النتيجة مهما كانت هههههههههه

هذي من القنوات المفضلة عندي بيوتيوب موجود فيها افلام وثقائية ثيرة و متنوعة

هوس الترتيب 

انا اعتبرة شي حلو و انبسط عليه (قاعدة اسلك لنفسي) لازم اغراضي تكون مرتبة و بمكانها ولازم اللي يستعملها يعاملها نفس معالمتي خصوصا المكياج عادي جدا انظف ورى اختي اذا جت استعملت تسريحتي بثرة صح! هههههه و اول فكرة تجي ببالي لما اعصب هي اني انظف او اقد ايد ترتيب الاغراض بس لحد يقول لي رغد روحي نظفي اغراضك او ترتبينهم لازم من نفسي

الشموع

 اعترف ان عندي هوس شمووع عادي اجمع مليون وحدة دايم احرص ان ريحة غرفتي حلوة و اخاف يخلصون فاستغفل تخفيضات bath and body works

احب الشمس 

ادري انه هالشي ممكن يكون غريب بس صدق نفسيا يجيني اكتاب اذا مثلا قمت و الشمس مو طالعة احس لازم اشوفها ههههه 

و احب اقعد بمكان منور يجيب لي سعادة و يحسن مزاجي و كمان ما احب اقعد بمناطق مغلقة لما اطلع لازم المكان يكون مكشوف احب اشوف الناس 

 و الزحمة و الحركة ما احب ينقفل علي بستارة كاني قاعدة بالبيت و يا سلااام لو انت الجلسة خارجية بس جونا ما يساعد للاسف 

التصوير

مو التصوير الشخصي احب اصور منتجات او مناظر مرة استمتع بوقتي و و انا اصور او اعدل الصور و الوقت اللي اقعد افكر كيف اخلي الشي يشد النظر

التسوق الوهمي

,في عادة انبسط عليها و احس اني مجنونة شوي احب افتح مواقع اونلاين لاي شي و كل شي اثاث, لوح, ملابس, مكياج, منتجات عناية, اشياء غريبة و اقعد انقي اغراض و انسق و اعبي السلة بس ما اشتري ولا شي منهم و خلاص يطلع من راسي اصير ما عاد ابيه ههههههههه


الحين بحط لكم روابط البنات المشاركين معاي بهالفكرة الحلوة

أمل سلطان @Terter_Thinks
http://geni.us/terterthinks

المها بيوتي @Almaha_Beauty_
http://geni.us/almahabeautyblog

غادة عبدالله @Ghada_Abdullah09
http://geni.us/ghadaabdullah

بيان @Bayanola92
http://geni.us/bayanola

مرمر @Murmur_blog
http://geni.us/murmurblog

نورة @whatauraloves

https://www.youtube.com/watch?v=yhtMugQA7gE

أشواق خالد @Ashwaqkh 
https://www.instagram.com/ashwaqkh/?hl=en

حنان الهيدان @Chat_With_Hanan
http://geni.us/chatwithhanan

اتمنى انكم استمتعتو بهالتدوينة بقد ما انا استمتعت بكتابتها و اشوفكم بتوينة جديدة قريييب  

سلسلة الاساسيات: فرش العين, انواعها و طريقة اختيارها

اهلين بنات انشاءالله كلكم تكونون بخير

موضوع اليوم كان بناء على طلب نسبة كبييرة منكم و حبيت اوثقة هنا عشان تقدرون تشوفونه باي وقت و اخذ راحتي بالكتابة

الفرش موضوع كبير و يحير و اغلب البنات ما يعرفون يختارون فرش تناسب حجم عينهم اوعندهم فرش و ما يعرفون يستعملونها فاليوم بشرح لكم بشكل بسيط عنهم و بركز على فرش الدمج, اذا حابين تعرفون اكثر عن كيف يطلع معاكم الشدو نظيف اضغطو هنا عشان تقرون الموضوع اللي كتبته

انواع الفرش

الفرش تنقسم لنوعين شعر طبيعي و شعر صناعي و زي ما تعرفون الشعر الصناعي مخصص للمنتجات الكريمية لتوزيعها و دمجها لانه ما يمتص المنتج بعكس الشعر الطبيعي فهو يستعمل لمنتجات البودرة

فرش العين الضرورية عند كل بنت

مو لازم يكون عندك عدد كبير من الفرش عشان تسوين اي لوك تبينه و مع الوقت و الممارسة بتعرفين ايش ناقصك فأذا ابد ما عندك خبرة لا تاخذين مجموعة فرش كبيرة لان بتحتارين و بيصعب عليك الموضوع

خلي عندك : فرشة دمج, فرشة فلات عشان تحطين الشدو على الجفن المتحرك, فرشة البينسل اللي يجي شكلها زي القلم حلوة لتحديد الكسرة او دمج الشدو تحت العين او تموية الايلاينر و اخر شي فرشة دقيقة لاضاءة المدمع و شدو تحت العين

اهم نقطة ضروري تعرفونها هي مقياس حجم الفرشة مقارنة بحجم عينك و المساحة اللي عندك بين الجفن و الحاجب لانها تلعب دور كبير فلو اخذتي فرشة مرة كبيرة و عينك صغيرة ما راح يبان شغلك نظيف و بيوصل الشدو للحاجب و ما راح يطلع زي ما تبين

كبداية هذول بيكونون كافين لك عشان تسوين اي لوك سواء خفيف او ثقيل و زي ما قلت لكم مع الوقت بتبدين تعرفين ايش ناقص من فرش العين و تبدين تشترينهم بالتدريج

فرش الدمج

طبعا في كثير انواع و احجام لفرش الدمج بوريكم بعضها و بشرح لكم استخداماتها عشان تاخذون فكرة و تعرفون ايش تحتاجون

النوع الاول: تجي الفرشة منفوشة و شعرها طويل هذي حلوة لتوزيع اللون على الكسرة او كامل الجفن او ما بين تدرجات الشدو عشان يبان كلة مدموج صح و ما في حدود, هذي اشوفها اساسية عند كل بنت

النوع الثاني: فرش الدمج المضغوطة يكون شعرها اقصر من اللي قبل, هذي حلوة لدمج الالوان بالكسرة بشكل ادق بدون ما توزع اللون كثيير فيكون عندك قدرة تحكم اكثر بالتوزيع

النوع الثالث: فرش الدمج المدببة (يكون حجمها متوسط و الشعر فيها طويل) مناسبة للشغل الدقيق للكسرة او لو تبين تحددين الزاوية الخارجية او الداخلية للعين و حتى لتوزيع الشدو تحت العين

النوع الرابع: فرش الدمج الدقيقة, هذي ممتازة للي تحب تسوي لوكات محددة و تبي تتحكم بمكان الشدو و طريقة دمجة ممكن تستعملينها للالوان الغامقة بالكسرة او لدمج تحت العين , حلوة بالكسرة للبنات اللي عيونهم صغيرة

تذكرو ان كل ما قل شعر الفرشة قلت مساحتها بالدمج و كل ما كان الشعر طويل فتوزيها للون بيكون خفيف مو مركز

كيف ادمج صح؟

 لا تاخذين كمية كبيييرة من الشدو دايم ابدي بكمية قليلة و زيدي بالتدريج لان اسهل عليك بالدمج و تقللين من اي اخطاء ممكن تصير معاك و خذي وقتك و انتي تدمجين لا تستعجلين

احرصي ان المكان اللي تتمكيجين فيه اضائتة كويسة عشان تشوفين بالضبط وش قاعدة تسوين و الالوان باينة بشكل واضح, اكيد كلنا حصلت لنا مواقف اننا تمكيجنا باماكن اضائتها سيئة و انصدمنا بالنتيجة زي غرف الفاندق

لا تمسكين الفرشة قريب من الشعر كذا انتي قاعدة تحطين ضغط عليها و ممكن تواجهين صعوبة بالدمج و يطلع معاك مبقع

 امسكيها من النص او النهاية شان يخف الثقل و تصير يدك خفيفة و انتي تدمجين ان هي اللي بتسوي الشغل عنك و بتوفين كيف دمجك بيتحسن بس لانك مسكتي الفرشة بشكل مختلف 

حركة الفرشة: هذي من النصايح المهمة اللي مو كثير بنات يركزن عليها و ما يدرون انهم يغلطون, اذا انتي تبين توزعين اللون و تسحبينه على برى حركي الفرشة بطريقة المسح (روحي و ارجعي) بشكل خفيف دايما نسوي ذا لما نحط اللون الانتقالي او ندمج ما بين الدرجات عشان ما يصير في حدود

 اما اذا تبين تدمجين اللون بمكان معين و تبين تتحكمين بانتشارة او لو حابة تمدين اللون على كامل العين بشكل شوائي حركي الفرشة بشكل دائري بنفس طريقة المسح. اكيد حجم الفرشة و طول الشعر بيغير من النتيجة

ايش افضل انواع الفرش؟

حلو ان تشترين شي و يدوم معاك و تبنين عليه احسن من ما تاخذين شي جودتة سيئة و ما يعطي نتيجة صح, انا احب فرش سيجما عندهم مجموعات مختلفة و يعيشون معاك لمدة طويلة بدون ما يتغيرون و نفس الشي زويفا خذي مجموعة و اللي ينقصك اشتريه لحاله كل هالماركتين يسمحون لك تشترين الفرشة بشكل منفصل, فرش سيفورا كمان جودتها زينة

بكذا نكون خلصنا موضوع فرش العين ان شاء الله انكم استفدتو و تعلمتو شي جديد بدون ما اكون طولت عليكم و  اشوفكم بتدوينة جديد

سلسلة الاساسيات: نصايح للارواج السائلة (كيف تخلينها مريحة على الشفايف + كيف تعرفين الماركات اللي بتناسبك)

اهلين جميلاتي انشاءالله كلكم تكونون بخير

 اليوم بنتكلم عن موضوع احبة كثيييييرو هو الارواج السائلة لو متابعيني بانستغرام و سناب شات اكيد تعرفون هالشي عني, فحبيت اشارككم بعض النصايح الي بتسهل عليك استعمال و اختيار الارواج السائلة 

 طريقة اختيار الارواج

تقريبا كل ماركة بالحياة طلعت لها كولكشن ارواج سائلة و الخيارات المتاحة عندنا كثيرة و الاراء عنهم كمان كثيرة, بالنسبة لي لما اجي اشتري اول شي احب اسويه هو اني اشوف شكل الروج على الشفايف بالطبيعة و بما ان هالشي شوي صعب و ما نلقاه بالريفيوز دايم احب اعتمد على لليوتويب, دوري على وحدة تحسين شفايفها زي شفايفك, كيف؟ لاحظي هل شفايفها فيها خطوط؟ ناشفين؟  شفايفها ناعمة ما فيها خطوط؟ عشان يكون عندك فكرة تقريبية لشكل الروج عليك و ايش اللي ممكن تشتكين منه او يضايقك مثلا لو وحدة نافخة شفايفها فاكيد ما عندها الخطوط الطبيعية و انتي نفرض ان  عندك خطوط فبتشوفين شكل الروج حلو عليها و تتحمسين تاخذينة و لما تجربينه تحسينه ينشب بالخطوط الصغيرة و ناشف فما ناسبك عشان كذا حاولي تلقين احد يكون نفس ذوقك,  اذا شفايفك شديدة الجفاف دوري على ارواج فيها نسبة ترطيب و بالنسبة للخطوط في منتجات ممكن تشترينها تقلل من مظهرهم مثل برايمر الشفايف من ماك او اربن ديكاي

من الماركات المفضلة عندي: كات فون دي, غرلاكتك, دوس اوف كلر, ذا بالم, سيفورا, هدى بيوتي, كايلي, كلر بوب الساتن مو المات, جيفري ستار, و كلرد رين

العناية قبل الروج

من اهم الاشياء اللي ضروري تسوونها هي التقشير و الترطيب قبل اي روج عشان يبان اللون موحد و ما يكتل على الشفايف او يقشر او يبرز الجفاف و الجلد الميت, استعملو اي مقشر تحبونة و حتى ممكن تسونه بالبيت بس اخلطو سكر و زيت زيتون, بالنسبة لي احسن مقشرين جربتهم هم من لش و غلام غلو. كثير بنات يشتكون ان المقشرات ما تضبط معاهم و ما تشيل الجلد الميت من الشفايف او تجرح شفايفهم و بقول لكم الحل, بكل بساطة يصير كذا لان المنطقة ناشفة و انتي قاعدة تحطين عليها شي خشن فطبيعي انها بتألمك او ما تسوي شغلها صح و الحل جدا بسييط رطبو شفايفكم كوييس قبل المقشر ب 5 دقايق او استمعملو فوطة ناعمة مبللة بموية دافية و خلوها على الشفايف و ممكن بنفس الفوطة تحطون المقشر و تقشرين شفايفك بحركة دائرية

  ليه نرطب اذا احنى بنقشر؟ لان بكل بساطة احنى نبي الجلد الناشف يلين عشان ينشال بسهولة بدون ما يجرح الشفايف

بعد التقشير اكيد لازم نرطب, بالنسبة لي افضل استعمال الزيوت لان الترطيب كذا يوصل لطبقات اعمق و ما يظل على السطح بس و حركة ثانية تعلمتها من ميك اب ارتست هي استعمال كريم العين كمرطب للشفايف قالت انها تستعملة للعرايس اللي شفايفهم مرة ناشفة عشان ترطبهم بعمق لان كريمات العين مخصصة بانها تنحط على منطقة رقيقة و ترطبها بعمق و الصراحة نتيجته احلى من مرطبات الشفايف يعطي ترطيب عميق و ما تنشف شفايفك خلال اليوم ( ممكن قبل ما تبدين تتمكيجين تحطين مرطب للشفايف و لما يجي دور الروج امسحي الزايد و حددي شفايفك) عشان تتأكدين انها مترطبة بشكل عميق خوصا لو كنتي من البنات اللي شفايفهم دايم ناشفة

نصايح عامة للارواج السائلة

اول نصيحة: بنات ضرووووري تشيلون الوبر او الشنب فوق الشفايف خصوصا مع الاروج الغامقة لانها اصلا تجذب الانتباة للشفايف فمو حلو شكل شفايف مرسوم و لون حلو و فجاءة شنب فشيلو الشعر بالطريقة اللي تريحكم انا استعمل الشفرة ممكن تستعملون شمع او فتلة اللي يريحكم 

ثاني نصيحة: محددات الشفايف كمان من الاشياء المهمة قبل الارواج و خصوصا الارواج السائلة عشان يتحدد شكل الشفايف و تبرزينها بمنظر حلو و نظيف, اذا كنتو بتستعملون المحدد ابدا لا تحطونة بعد ما ينشف الروج السائل لان قوامهم مختلف عن بعض و ما راح يندمجون سوى فبيبان وين خط المحدد و وين الروج

ثالث نصيحة: بعلمكم حركة بيحبونها الكسولات مثلي , على كثر ما احب المكياج ابد ما احب اخذة معاي بشنطتي لما اطلع و ما احب اعيد على الروج و هالحركة سويتها مرة و انصدمت بالنتيجة و صرت اطبقها دايم خصوصا  للجامعة, اللي اسوية هو اني احدد و اعبي شفايفي كلها بمحدد غامق بعدين اجيب اي روج سائل فاتح ممكن يكون لحمي او وردي و احطة فوقة, اللي يصير هو ان المحدد الغامق يصبغ شفايفك و الروج يفتح اللون فما يكون غامق و حاد, الحلو بالحركة انه حتى لو راح الروج ابدا ما يبان لان شفايفك انصبغت بلون المحدد و الروج اساسا يدوم لوقت طويييل و بنفس الوقت الحركة تساعدك بانك تخترعين الوان و درجات مختلفة بدون ما تشترين ارواج كثير, كتبت عنها بانستغرام من قبل تلقون الموضوع هنا

لون الروج الاساسي هو الدرجة اللي فوق

رابع نصيحة:  تكبير الشفايف من الحركات اللي احب اسويها كمان بس ما راح اتكلم عنه كثير لاني كتبت موضوع كامل بانستغرام ممكن تشوفونها هنا, بس بشكل عام اذا تبين تكبيرين شفايفك استعملي محدد مايل للبني عشان تخلقين ظل او كونتور لشفايفك و يبان الشكل واقعي و اذا تبين تحطين اضاءة حطيها قبل ا ترسمين شفاسفك مو بعد عشان ما تخرب الرسمة و من الحركات اللي بتثبت لك الرسمة و تبينها واقية اكثر هي انك تحطين لوس باودر شفافة على مكان الرسمة, كيف؟ بد ما تكبرين شفايفك بالمحدد و تتأكدين ان الرسمة اجبتك بفرشة صغيرة حطي كمية بسيطة من اللوس باودر و طبطبي على المكان اللي رسمتي فيه التكبيرة بس و بعدها عبي شفايفك بالروج السائل اللي يصير هو ان البودرة بتثبت الرسمة  حتى لو راح الروج كامل بتظل الرسمة موجودة فبس تيدين لى الروج ا يحتاج ترسمين من اول و جديد, و بتخلق لك ارتفاع يتناسق مع ارتفاع شفايفك الطبيعي فأبدا ما راح يبان انهم مرسومين 

خامس نصيحة: هي شي يعانون منه البنات كثييير و هو الخط الفاصل اللي يطلع بالشفايف من جوى خصوصا مع الارواج الغامقة, انا اليوم بعلمكم الحل

 اول شي تسوونه هو انكم تحطون اي تنت شفايف عشان يصبغ لون الشفايف و ما يبان الفرق بشكل واضح, ثاني شي تأكدي انك معبية شفايك بالتحديد , ثالث شي و هو الاهم هو انك تحرصين انك ما تحطين كمية كبيرة من الرواج السائل لان لو كثرتي بيتجمع و يكون طبقة و يفصل فتأكدي ان الكمية اللي تحطينها داخل الشفة تكون قليلة و موزعة بالتساوي و طبعا احرصي ان ما يكون في اي قشور و اذا شفايفك مرة ناشفة او دايم يروح اتركي هالمنطقة فاضية لا تحطين روج سايل و جيبي روج عادي بنفس الدرجة و طبطبيه على شفايفك من جوى عشان تتفادين الخط الفاصل

ازالة الروج السائل او المات

اسهل طريقة ممكن تسوونها هي انكم تستعملون مزيل اساسة زيتي عشان يفكك المنتج بدون ما تفركين شفايفك او تحوسين الدنيا و يطبع اللون على بشرتك خصوصا لو كان غامق بكل بساطة بللي القطنة بزيت زيتون او زيت جوز الهند او اي مزيل مكياج زيتي تحبينه و اتركيها على شفايفك دقيقتين بعدين سويي حركة دائرية بسيطة على مكان شفايفك بدون ما تجين على البشرة و اسجبي القطنة على قدام ( زي لما تمسحين خشمك ادري ان التشبية غبي بس المهم توصل لكم الفكرة ههههههه) كذا ما راح ياخذ معاكم وقت طويل و بينشال بسهولة

و بكذا  يكون خلص موضوع اليوم انشاءالله انكم استفدتو منه و اشوفكم بتدوينة جديدة

كيف ازيل مكياجي (منتجات+ عادات) غيرت بشرتي للافضل

اهليين جميلااتي

اليوم جبت لكم موضوع كنت حابة اتكلم فيه من فترة و احترت بالطريقة فما لي الا هنا عشان اكتب على راحتي , جهزي قهوتك و استمتعي بالقراءة

انا من المؤمنين ان جمال البشرة هو اللي يحلي المكياج مو العكس و مهما حطيتي ما في شي يخفي العيوب 100% ,اذا كان اساسك  مبني على بشرة صح المكياج كله بيطلع صح حتى لو ما عندك خبرة كبيرة, فدايما احاول اني احرص على العناية و الماسكات و اليوم بشارككم ببعض المنتجات و العادات اللي غيرت بشرتي للافضل الحمدالله

:تغير طريقة ازالة المكياج

اول شي سويته و فرق معاي كثيييير و هو اني غيرت طريقتي بأزالة المكياج تماما, زمان كنت استعمل المناديل المبللة عشان اشيل مكياجي على الرغم من انه مو شي صح لان فيها اضرار كتب عنهم هنا الا اني كنت ما احسها تأثر لاني اغسل بعدها بجهاز فوريو صح ان ما يبقى اثر مكياج بس ما كنت احس ان مظهر بشرتي نقي و لازم يكون عندي كم حبة مستحيل يكون وجهي صافي

 اغلب انواع المناديل يكون فيها مواد كيميائية عشان تسهل ازالة المكياج لكن بقائها على بشرتك ممكن يظرها و يسبب حبوب و مكن اصلا ما يشيل مكياجك بس يحركة من مكانة و يحتون على كحول و طبعا معروف كيف ينشف البشرة و احتمال يحسسها, كمان كلها تحتوي على مواد حافظة عشان يحافظون على عمرها الافتراضي وهالمواد مهي امنة على البشرة فتركت هالتكنيك و حولت على المزيلات الزيتية و المائية و ما اوصف لكم كيف ارتاحت بشرتي من بعدهم و المكياج ينشال بسهولة و ملمس بشرتي صار انظفو قلة الحبوب بنسبة كبيييرةو البشرة صار فيها اشراقة و حياه فرق عن اول مرة الحين مستحيل ارجع استعمل مناديل مرة ثانية

كيف اشيل مكياجي؟

مهما كانت الكمية اللي حاطتها ابدي اول شي بالمزيل الزيتي اخذ كمية بسيطة و افركها على وجهي كامل و اسوي مساج خفيف عشان اتأكد ان مكياجي كله ذاب, بعد كذا ابلل ايديني بالموية و اشطف الزيت مع الموية يتحول قوامة من زيت لكريم او رغوة خفيفة, لما اغسلة كله على طول استعمل جهاز لونا و غسولي المفضل عشان اتاكد ان ما بقى ولا نقطة مكياج على وجهي, للعيون اخذ قطن اذان و ابللة بموية الميسلار من غارنية او بايودريما و امررها على منابت الرموش شان اتأكد ان ما بقى اي مسكرة او كحل بعيني, انشف وجهي و ابدى بروتيني للعناية

لما تشيلين المكياج احرصي انك تنظفين منطقة الجبهة عند منابت الشعر كويس و كمان اطراف الوجة لان كثير بنات تطلع لهم حبوب بهالمناطق تكون شبة دائمة و مكررة فممكن عدم التنظيف الصحيح يكون سبب, جربو تمسحون بتونر او موية ورد و بتلقون بقايا مكياج حتى بعد الغسيل

:المنتجات اللي فرقت بمظهر و ملمس بشرتي

كيلز من الماركات اللي مرة احبها و ساعدت بشرتي كثيييير بتحسين القوام و المظهر, منتجاتهم علاجية و يميلون للمواد الطبيعية و هذا اللي ابحث عليه انا لما اشتري منتجات عناية ما احب اخذ منتجات فيها عطور,كحول, او اي مكونات قاسية على البشرة

سيروم تصحيح البقع و الاثار

كتبت عنه بأنستغرامي من قبل ممكن تشوفونه هنا, السيروم يحتوي على (ايثيل ايستروبك اسد)  و هو جزء من فيتامين سي يعطيك
 كل منافعة من مضادات الاكسدة, التنوير, مساعدة ببناء الكولاجين بدون ما يتأثر بالحرارة مثل الشمس او الاوكسجين

يحفز من انتاج الكولاجين بالبشرة و يتخلص من الاثار و التصبغات, انا عندي منطقة اطراف الخد مكان الكونتور غامقة شي كانني حاطة برونزر فكانت مضايقتني و كان عندي اثار حبوب بسيطة بسبب اهمالي بواقي الشمس فبنات نصيحة ابد لا تستهينون بواقي الشمس. لاحظت النتيجة بعد تقريبا ثاني اسبوع البقع خفت و الاثار كمان, استعملت تقريبا 3 علب و اكثر شي عجبني هو انك ما تحتاجين كمية كبيرة و نتايجة ثابته اذا وقفته ما ترجع بشرتك مثل اول, كمان شريت من نفس المجموعة المقشر و الغسول الرغوي و ساعدوني بالنتيجة و سرعة ظهورها

ثاني منتج هو سيروم شد المسامات و البشرة



يحتوي على خلاصة الخميرة و هي معروفة بشد البشرة و زيت زهور الغيرانيوم و هو مليئ بمضادات الاكسدة و محاربة علامات التقدم بالسن، قوامة جداً خفيف و تمتصة البشرة بسرعة. بعد اسبوعين من الاستخدام لاحظت ان بشرتي صارت انعم و لها لمعة صحية و بعد شهر فعلاً شدت بشرتي و يبرز الكونتور الطبيعي بالبشرة زي عظمة الخد، و نتيجة الشد صار مظهر مساماتي مختفي (انا مساماتي صغيرة و ما تبرز بالمكياج بس انا موسوسة , للي مساماتها جداً واسعة ما اعتقد بينفعها)، ما توقعت منه هالنتيجة اللصراحة و اللي عجبني انه حتى لو وقفتيه ما ترجع بشرتك زي اول يعني هو فعلاً يحسن بشرتك مهو منتج تجميلي بقناع العناية زي اغلب اللي بالسوق، مرة احبة و ما استغني عنه بعنايتي لانه يعطي نفس النتيجة اللي يوعد فيها



ماسك غلام الابيض

هذا اكثر ماسك حبيته من مجموعتهم و فعلا عطاني نتيجة واضحة ينظف المسامات بشكل عميق من اول استعمال و يشيل كل رواسب الاوصاخ و الدهون و حتى لو عندك حبوب ينشفها بسرعة بدون ما يهيج البشرة انا احيانا احطة على الحبة بس لو ابيها تروح بسرعة و هو الوحيد بكل المجموعة اللي ممكن اشتريه انا كنت قاسية شوي برائي عن ماسكات غلام غلو بسبب سعرها المرتفع و اكيد محد بيجيبهم كلهم فاللي سويتة هو اني شريت الحجم الصغير من سيفورا و قلت اللي يعجبني من اول مرة بس هو اللي برجع اجيبة و هذا بس اللي صدق شفت فرق فرجعت اخذت الحجم العادي و ما ندمت اذا بشرتك دهنية او مختلطة جربي منه الحجم الصغير

هذي الصورة حبيت اوريكم ايها عشان تفهمون ايش قصدي و تعرفون معنى هالحركة لما تستخدمون ماسك بالفحم, لما تشوفون هذي الحفر الصغيرة معناتها ان الماسك قاعد يسحب الرواسب كلها من داخل المسامات و يأدي وظيفتة بشكل صحيح

ماسك اليقطين من بيتر تومس روث
هالماسك من مفضلاااتي صدق ما توقعت انه في ماسك بالسوق بيعطيني نتيجتة هو ماسك بأنزيمات اليقطين و يحتوي على الفا هيدروكسي و اكسيد الالمنيوم ادري ان اسماء المواد مخيفة بس لا تخليكم تتردون هو بارة ن ماسك تقشيري يجدد سطح البشرة يقرص شوي لما تحطينه و في حبيبات صغيرة للتقشير تخلينة بس 3 دقايق و تغسلينه يعطي منظر مشرق و يشيل كل الخلايا الميتة و القشور و اي رواسب بالمسامات تحسون طلع لكم جلد جديد بعده, انا استعمله مرة بالاسبوع او بصباح يوم اي مناسبة لما ابي يكون شكل بشرتي صافي و قطعة وحدة و لاحظت مع الاستعمال توحد لون بشرتي و خفت الاثار عندي

مناسب لصاحبات البشرة اللي ما تعاني من الحساسية  لانه قوي فممكن يهيج البشرة في عند سيفورا حجم صغير ممكن تاخذينة و تجربين على جزء صغير من وجهك

واقي الشمس

اعتقد كلكم تعرفون اهمية واقي الشمس و كيف يحمي البشرة من اضرار الاشعة مثل البقع و التصبغات و ضروووري تستعملونة
خوصا لو انكم جالسين تعالجون بشرتكم عشان تحافظون عليها كتبت عن مفضلاتي من واقي الشمس  هنا

قطرات كليرانس
هالقطرات المعززة من كليرانس حبيتهم مرة و فادو بشرتي بشكل كبير من ناحية المظهر العام للبشرة و ملمسها واشراقة البشرة, ما ياخذون وقت و تقدرون تخلطونهم مع اي شي كتبت عنهم بانستغرام بالتفصيل عن الانواع الثلاثة

عصاية بوتس للحبوب
انا اسميها عصايتي السحرية و البنات بسناب شات مغرقيني صورها ماشاءالله عليهم, تلقونها ببوتس بس لانها من نفس شركتهم, تحتوي على نسبة عالية من مستخلص شجرة الشاي  هو مكون معروف بتطهير تالحبوب و ازالتها, انا استعملها على الحبة صباح و ليل تشيلها بسرعة بدون ما تترك لها اثر ولا تنشف بشرتي كمان كاتبة عنه هنا


الحين نجي للمواد الطبيية اللي استعملتها و شفت فرق

اول شي موية الورد اتوقع اغلبكم يستعملها, حطيتها بعلبة بخاخ و ارشها بعد ما اغسل وجهي كتونر, خلال اليوم, اخلطها مع كريم العين, و احطها مع اي ماسك منزلي اسويه

طبعا موية الورد معروفة فوايدها بتنشيط الدورة الدموية و تقليل الافرازات الدهنية , تعطي نظارة و تساد بشد البشرة و مقاومة الشيخوخة و تقلل من الهالات, انا استعملها زي ما هي لاني لما خففتها بموية ما شفت فرق بس لما صرت استعملها لحالها فرق ماي مرة و صارت شي اساسي بروتيني

 المرة: المرة كان اضافة جديدة من قبل كم شهر بس النتايج كانت قوية و قلت لاااازم احكي لكم, ضروري تخزنينها بعلبة قزاز مو بلاستيك لانه يتفاعل مع المرة و يروح مفعولها . المرة تعتبر مادة مطهرة فجدا جميلة للي عندهم حبوب او اثار و يبحثون عن شي يصفي البشرة, الحبوب تصير تروح بسرعة و الاثار كمان, و تأثيرها لى المسامات جميييل انا استعمل منقوعها بقطنة و امسحها لى وجهي بعد ما اغسله و انتظرها تنشف بعدين اكمل روتيني عادي , لما تنشف ممكن تحسين وجهك شاد بس بعد ما احط الكريمات خلاص ما تحسين بشي ولا تشمين ريحتها

 ماسك الزنجبيل
هالماسك كتبت لك عنه بموضوع قديم عنالخلطات المنزلية, من فوائدة للبشرة هي:تأخّر علامات تقدّم السن والشيخوخة, يقلل من السموم التي تتعرض لها البشرة, يحافظ الزنجبيل على مادة الكولاجين في البشرة, يخلص البشرة من آثار الحبوب، وحب الشباب و ينظف البشرة ويطهرها
ينظف المسامات و يشيل الرؤوس السوداء 

اخر شي هو ماسك مكعبات الثلج اخذتة من البلوغر العنود هذا هو الموضوع بمدونتها 
انا احاول اني كل ما اسوي مكعبات الثلج استعملهم يوميا او يوم اي و يوم لا اذا نسيت.  اسرع شي لاحظتة هو المسام تحسونها تختفي و احلى شي انه سهل و سريع بس تاخذين الثلجة و تمررينا على وجهك و تنتظرينة ينشف و تغسلينه.  من فوائدة تنقية البشرة و يعطي اشراقة و منظر صحي او يعمل على زالة البقع و التصبغات و توحيد لون البشرة

و هذا هو موضونا لليوم انشاءالله انكم استفدتو منه و تعلمتو شي جديد, تذكرو ان ازالة المكياج هي من اهم الخطوات اللي ضروري تسوونها و ما تتساهلون فيها ابد لانها ممكن تسبب لك مشاكل كثير انتي بغنى عنها و بتضطرين تصرفين كثير على معالجتها, سوي لنفسك الروتين اللي يريحك و تأكدي انك دايما تنامين و بشرتك نظيفة

اشوفكم بتدوينة ثانية  

سلسلة الأساسيات: 11 نصيحة لنظافة الشدو

• اهلين جميلاتي وحشتوووني

موضوعنا اليوم عن نظافة الشدو و هو من اهم الاشياء بالنسبة لي, راح اعطيكم نصايح بسيطة تفرق الشكل النهاىي

اول نصيحة: تأكدي انك هيئتي جفنك صح, استعملي برايمر عشان تزيدين من ثبات الشدو و قوة اللون تكلمت عن برايمر العين من قبل هنا, هالخطوة مهمة كمان للبنات اللي عندهم تصبغ بالجفن و ما يبان لون الشدو معاهم بشكل واضح زي ما هو بالباليت 

ثاني نصيحة: اختيار اللون الاساسي اللي يكون قريب من لون بشرتك, منطقيا ما يصير بنت سمراء او حنطية تحط شدو ابيض على جفنها و تتوقعة بيبان طبيعي بالعكس مرة مو حلو و بيقلب باهت و رمادي خذي شي يكون بيج و دافي و احرصي ان اللون يكون قريب من لون بشرتك

ثالث نصيحة: نظافة الفرش, كثير بنات يشتكون ان لون الشدو بالباليت غير عن لما
 يحطونه على عيونهم و غالبا يكون السبب هو ان فرشة وصخة فحلو تخلين عندك فوطة صغيرة تمررين عليها الفرشة ما بين الالوان عشان تمسك اللون بشكل واضح و احرصي علي غسيل فرش كل اسبوعين

رابع نصيحة: اختاري فرش الدمج اللي تناسب حجم عينك عشان يتوزع اللون صح و ما يوصل لعظمة الحاجب او يدخل على لون الجفن و يتلخبط اللوك عليك و يصير كله لون واحد فيصعب تنظيفة, في خيارات كثيرة بالسوق و اونلاين و ضروري يكون عندك اكثر من فرشة للدمج الدقيق او الدمج العام بين الالوان عشان تتجاتنس, ابدا لا تستخسرين بفرش الدمج تراها تلعب دور كبييير بالنتيجة النهاىية و تسهل عليك الشغل مررررة

خامس نصيحة: اللون الانتقالي شي مهم بأي لوك تسوينه سواء كان خفيف او ثقيل لانه بيسهل عليك تدرج الالوان و تداخلها, كثير بنات يفكرون ان اللون الانتقالي يعني شدو برتقالي بس هو ابدا مو لازم يكون برتقالي انتي اختاريه من تدرج الوان اللوك اللي بتسوينه يعني لو بتسوين شدو بنفسجي او وردي او رمادي ما يصير تحطين برتقالي ما راح يبان متناسق,  ينحط بين الكسرة و عظمة الحاجب عشان يخلق لك تدرج متناسق للألوان من الافتح للأغمق و هذا هو هدفنا لما نسوي اي لوك للعين ان تبان الالوان مدموجة و متداخلة بدون خطوط او فواصل 

 سادس نصيحة: خذي وقتك بالدمج , لا تاخذين كمية كبيرة من الشدو لما تبدين دايما خذي كمية قليلة و تأكدي انها مدموجة و ابني اللون بالتدريج خصوصا لما تكون الالوان غامقة , جدا سهل انك تزيدين من حدة اللون اذا الاساس صح و مدموج و صعب تقللين من الكمية او تعدلين عليها لما تكثرين 

سابع نصيحة: عشان تتفادين حوسة الشدو و انه يوصل لعظمة الحاجب او لو تبين تبرزينها بشكل طبيعي بدون لمعة, لما تخلصين من رسم حاجبك و تنظيفة بالكونسيلر حطي كمية كويسه من الشدو الفاتح تحت الحاجب و اتركيها كأنك تسوين(بيكنغ) بس لتحت الحاجب و اشتغلي بالشدو عادي و لما تخلصين انفظي الشدو بيعطيك نتيجة نظييييفة و اضاءة طبيعيه للمنطقة و الحلو ان بيكون زي حاجز ما يخلي الوان الشدو توصل للعظمة, ممكن الحين تحطين لمعة او اتركيه مات طبعا اللي تشقر او فيها شعر كثيف لا تحطين لمعة على العظمة ابدا مو حلو

ثامن نصيحة: اذا بتشتغلين بالوان غامقة و اللوك ثقيل لا تحطين كونسيلر تحت عينك عشان تتفادين اي تساقط من الشدو بيحوس الدنيا و بتضطرين تعيدين , اشتغلي على عينتك براحتك بعدين نظفي المنطقة و حطي الكونسيلر كذا انظف و اريح

تاسع نصيحة: الايلانر مهو الشي الوحيد اللي يحدد و يرسم عينك في كثير طرق عشان تبرزين شكل عينك بطريقة طبيعيه بأستخدام الشدو, ممكن تبدين بقلم كريمي على خط الرموش و تدمجين شدو غامق على فوق و تسحبينه على برى, كذا تبرز عيونك بشكل ناعم و ممكن تسوين هالحركة اذا تواجهين صعوبة بالايلاينر

عاشر نصيحة: تنظيف طرف الشدو من الزاوية الخارجية من الحركات الحلوة لأعطاء العين حد و سحبة ممكن تستعملين شريط لازق من البداية او لو كان يحسسك و يخليك تدمعين مثلي و انتي تدمجين ثبتي أيدك اي بزنسس كارد او ورق مقوى عشان تحصلين على نفس الخط الحاد و هالشي ممكن يغنيك عن الايلاينر كمان 

اخر نصيحة: اتركو الرموش كأخر خطوة, كثيييرالاحظ بنات يكونون مركبين رموش و لما تطالع تحت يكون الرمش كأنه مغبر او عليه لمعة و السبب من ورى هالشي ان البنت بعد ما تركب رموش تحط ايشدو مات او لمعة و هالشي كله بينزل على رموش التركيب زي ما ينزل على رموشنا الطبيعية فيبان الرمش باهت و فالشغل يبان ابدا مو نظيف, دايما خلو تركيب الرموش كخطوة نهائية و احرصي انك قبل ما تركبينها تكونين حاطة طبقة خفيفة من المسكارة على رموشك عشان تندمج مع الرموش و ما يبان اي قرق بينهم و لا تحطون مسكرة على الرموش التركيب ابدا , خصوصا اذا كانت منك لانه يدمرها 

و بكذا يكون خلص هالبوست, كل شي يحتاج وقت عشان تبدعين فيه و تتقنينه اهم نصيحة اقولها لكم هي التدريب متى ما فضيتي اتدربتي علي اي لوك يجذبك من انستغرام او يوتيوب و حاولي تطبيقين اللوكات بطريقة تناسب عينك و جربي الالوان المختلفة الين ما تلاقين الدرجات اللي تناسبك , ابدا لا تخافين من الالوان الغير اعتيادية راح تنصدمين بجمال التجانس بين الالوان لما يكتمل المكياج و شي طبيعي انك تغلطين و تخبصين شوي محد صار شاطر بيوم و ليلة ترى مكياج و بالنهاية ينمسح. انشاءالله انكم استفدتو و سهلت عليكم ولو شوي و اشوفكم بتدوينة جديدة